Gjaldskylda tekin upp á endurvinnslustöðvum

28.12.2011

Samþykktar hafa verið breytingar á gjaldskrám Sorpeyðingarstöðvar Suðurnesja sf. sem taka gildi hinn 1. janúar 2012. Endurskoðun á gjaldskrám fyrirtækisins voru síðast gerðar hinn 1. febrúar 2010. Breytingar taka m.a. mið af þróun verðlags og einnig hafa kostnaðaráhrif mismunandi tegunda úrgangsefna verið endurmetin.

Gjaldskrám Kölku er nú skipt í fjóra mismunandi flokka sem eru eftirfarandi:

·Gjaldskrá fyrir stofnanir og fyrirtæki
·Gjaldskrá á endurvinnslustöðvum Kölku í Vogum, Grindavík og Helguvík
·Almenn gjaldskrá fyrir spilliefni
·Gjaldskrá fyrir spilliefni og önnur skilgreind efni frá verktökum Úrvinnslusjóðs

Gjaldskrárnar eru birtar hér á heimasíðu fyrirtækisins, www.kalka.is.

 
Gjaldskylda á endurvinnslustöðvum
Frá og með 1. janúar 2012 verður tekin upp gjaldskylda á endurvinnslustöðvum Kölku í Vogum, Grindavík og Helguvík fyrir tiltekin úrgangsefni frá heimilum og verður tekið á móti greiðslukortum. Áfram verða þó fjölmargar tilgreindar tegundir úrgangsefna undanþegnar gjaldskyldu eins og verið hefur.
Með þessari breytingu verður rekstraraðilum leyft að losa sig við úrgangsefni í takmörkuðu magni á endurvinnslustöðvunum gegn gjaldi.
Vakin er athygli á því að allur úrgangur sem berst á endurvinnslustöðvar Kölku með bifreiðum sem bera rauðar númeraplötur og/eða eru merktar fyrirtækjum, er litið á sem gjaldskyldan rekstrarúrgang. Úrgangur frá fyrirtækjum sem að mati starfsmanna Kölku er ekki móttökuhæfur á endurvinnslustöð, verður vísað til móttökustöðvar í Helguvík.

Gjaldtaka á endurvinnslustöðvunum verður samkvæmt rúmmáli og í gjaldskránni er  skilgreint hvaða úrgangsefni eru gjaldskyld og hvaða úrgangsefni eru án gjaldskyldu fyrir heimili. Einnig má sjá gjaldskyldu og undanþágur fyrir rekstraraðila. Fyrir rekstraraðila vísast að öðru leyti til gjaldskrár fyrir stofnanir og fyrirtæki.

Gjaldskrár fyrirtækisins eru aðgengilegar hér á heimasíðunni og eru allir hvattir til að kynna sér þær vel. Allar frekari upplýsingar eru veittar á skrifstofu fyrirtækisins í síma 421-8010.

Vakin er athygli á að allur úrgangur sem móttekinn er á endurvinnslustöðvum Kölku þarf að vera vel flokkaður.

Til baka